السوشيال ميديا كلها ولعت بأخبار انفصال #محمد_رشاد و#مي_حلمي قبل ما يدخلوا الفرح ع طول
أنا لا يعنيني سبب انفصالهم ومين غلطان ومين مش غلطان دي حياتهم الشخصية وهم حرين فيها ومش عايزة أخوض في الأسباب لأنها حاجة مش هتوصل لأي حاجة في الآخر
اللي عايزة اتكلم عنه هنا كمية التعليقات اللي ظهرت من نوعية آدي آخرة الحب ومفيش حاجة اسمها حب ومش عارف ايه
أولاً أنا عايزة أسأل الناس اللي بتقول الكلام ده هو انتم تعرفوا منين هم بيحبوا بعض ولا لا؟
هيرد عليا حد ويقولي ده بقالهم سنتين مخطوبين وبيعدوا ينزلوا صورهم مع بعض ويكتبوا لبعض كلام حب ويطلعوا في البرامج يحبوا في بعض ويغنيلها وتغني له وبتاع
معلش طب هو ده مقياس الحب يعني؟!
أي اتنين مخطوبين دلوقتي بيعملوا الكلام ده بتبقى جوازة صالونات أصلاً ولسة عارفاه امبارح وأمها هي اللي زنت عليها عشان توافق وأبوها أقنعها ان ده العريس اللقطة اللي هيجيبلها الشقة والعربية اللي نفسها فيهم ويعملها الفرح الواو اللي هتتباهى بيه على صحابتها وقرايبها فتوافق وتاني يوم تنزل ببوستات حب وسهوكة وهي لسة متعرفوش أصلاً!!!!
مش بقول ان كل اتنين بينزلوا بوستات حب ويتصوروا مع بعض ع السوشيال ميديا مبيحبوش بعض ولكن ده مش مقياس الحب
محدش بيضرب بوز في الصور ولا في اتنين هيتصوروا وهم بيتخانقوا ومش طايقين بعض ولا هينزلوا بوستات يشتموا فيها بعض لو لسة ناوين يكملوا عشان منظرهم قدام الناس
الكاميرا دايماً بتلقط الصورة الحلوة وبس والحب الحقيقي هو اللي بيحصل ورا الصور
الحب مش في نظرة عارفة انها هتتلقط بالكاميرا ولا شوية سهوكة ع فيديو لايف بنفرج عليه الناس
الحب حياة كاملة، الحب أفعال وتصرفات مش كلام وصور
مينفعش تحطوا اتنين مشاهير هم دليلكم للحب لو هم نجحوا يبقى الحب ناجح لو هم فشلوا يبقى الحب فاشل لأنكم أصلاً متعرفوش حقيقة مشاعرهم هل هي حب حقيقي فعلاً ولا جواز مصلحة بالعقل بيغلفوه للناس بمظهر الحب، انتم مش بتشوفوا من حياتهم غير اللي هم عايزين يورهولكم، وحتى لو بيحبوا بعض بجد ده مش معناه انهم هيبقوا المثل والقدوة اللي كل تصرفاتهم صح ولازم تقتدوا بيها، في ناس بتبقى بتحب أه بس بتعامل الطرف التاني معاملة زي الزفت لحد ما يطهق وينفصلوا، العيب هنا مش في الحب العيب في الشخص نفسه وتصرفاته وأخلاقياته اللي هو اتربى عليها طول عمره، الحب مبيغيرش حد 180 درجة، الحب بيطلع الحقيقة اللي جواك لو واحد حقيقته زفت هيبقى زفت مع اللي بيحبه ولو حد حقيقته نقي وطيب هيطلع كل الخير اللي جواه مع اللي بيحبه
وهنا يحضرني قول خالدة الذكر #كوكب_الشرق #أم_كلثوم لما قالت:
ياللي ظلمتوا الحب
وقلتوا وعدتوا عليه
قلتوا عليه مش عارف إيه
العيب فيكم يا في حبايبكم
أما الحب يا عيني عليه 
الحب أفعال مش صور وكلام
سارة الليثي 