حوادث

وأنا قاعدة بتأمل في ذكريات كتاب حياتي يا عين اللي ما شفت زيه كتاب
اكتشفت إن كل الحوادث والعمليات اللي حصلت لي في حياتي كانت في القاهرة:
1- وأنا عندي تلات أربع سنين كدة كنا عند تيتة الله يرحمها وماما كانت بتلبسني فالبلوزة شبكت في وداني وصوت جامد واكتشفنا ساعتها إن الحلق مورم وداني وعامل صديد وعملت عمليتين فيها ومن ساعتها مبلبسش حلقان وخرم وداني اتسد أصلاً ومبقاش في مكان للحلق من أساسه
2- وأنا في تالتة ابتدائي تقريباً كنت في نادي المهندسين اللي في أبو الفدا -أيام ما كان فيه مراجيح قبل ما يجيبوه ع الأرض-، وكان فيه مرجيحة ساعتها اسمها القطر -المرجيحة دي مكنتش موجودة أياميها في أسيوط بس هي دلوقتي موجودة في نادي المهندسين أول مرجيحة ع الشمال واحنا داخلين من بوابة النادي- المرجيحة دي مرجحيحة جماعية بيركبوها العيال زي القطر كدة، وكانت طول الوقت زحمة ومليانة والكبار بيزقوها فمبتقفش واللي عايز يركبها بينط عليها وهي بتتحرك ويركب في مكانه، وأنا كنت عملت كدة فعلاً كذة مرة قبل كدة، لكن في المرة دي لما نطيت قدمي اليمين اتحشرت ما بين أرضية المرجيحة والعمود اللي بيحركها وبقت رايحة جاية عليه، وأنا مش مدركة إيه اللي بيحصل أصلاً وحاسة بألم بس مش عارفة أقول ايه؟ ومستنية المرجيحة تهدي عشان اعرف اسحب رجلي، وأنا في اعتقادي انها مجرد حشرة بسيطة، لحد ما إذ فجأة لقتني اتنطرت من المرجيحة والكوتشي اتخلع من رجلي -كان كوتشي تكني كلر كدة فيه ألوان الطيف كلها معرفش راح فين؟- ومكنتش لابسة شراب ساعتها، ولاقيت نافورة دم سايحة بتبظ من قدمي، وأنا كل اللي طلع عليا اني عمالة أصوت -مش من الألم الحقيقة هو من الخضة والصدمة بس 😃 – والموضوع رسي في الآخر ع سبع غرز كبار لسة معلمين في قدم رجلي شبه البرص كدة
3- نسكت ع كدة؟ لا طبعاً بعديها بسنة بالظبط في عيد الفطر كنت لسة واصة القاهرة وحاطة رجلي في البيت عند تيتة وبنحتفل بالعيد بقى والعيد فرحة وكدة، وزي أي طفل برئ بيلعب بالديناميت عادي كنت بفرقع ديناميت فقام فرقع في صوابعي الحمد لله يعني وعمل مدة وصديد وبلا أزرق ع دماغي، ولسة فاكرة بابا يومها وهو بيقول للدكتور كل المصايب بتحصلها في القاهرة ومع ذلك بتحب القاهرة أكتر من أسيوط، وده عشان أنا كنت عيلة متخلفة الحقيقة لكن أنا دلوقتي عرفت مصلحتي وبحب أسيوط أكتر والله
4- ولم يكن ده أبداً نهاية المطاف، ففي 2015 في عيد الأضحى تقريباً كنا راجعين من كايرو فيستيفال في أمان الله وع دخلة العجوزة من كوبري 6 أكتوبر عملنا حادثة بالعربية والموضوع قلب بخناقة وناس بتشرشح وشتايم قذرة ع الرغم من انهم الغلطانين أصلاً، ومحمد ربنا يرجعه بالسلامة يا رب نزل اتخانق معاهم ساعتها واتضرب بكوريك العربية ودماغه اتفتحت، وأنا كنت بدافع عنه وقلعت الجزمة أضربهم بيها وكان يوم ما يعلم بيه إلا ربنا 😃
5- وبمناسبة حوادث العربيات برضه فمرة زمااااان وأنا صغيرة أول عربية بابا جابها ولعت منا واحنا ماشيين في شوارع القاهرة مع إننا أصلاً كنا شارينها من أسيوط ومشينها بيها في ومن أسيوط عادي وأول ما وصلت القاهرة ولعت 😃
6- وأخيراً -وربما ليس آخراً- كانت حادثة الموتوسيكل الأخيرة اللي بسببها بقالي خمس أيام راقدة في البيت ومش عارفة أخرج ولا أروح #معرض_القاهرة_الدولي_للكتاب وأشوف كتابي #خضار_الروح بعد كل شوق الانتظار ده 🙁
تقريباً أسيوط مكنش فيها غير عملية ولادتي بس، اللي برضه كانت عملية سودة ومهببة يعني 😃
#صفحات_من_حياتي #سارة_الليثي

الإعلان

أو ما يشبه العشق للكاتبة فدوى حسن

كتابات فدوى حسن كما يتضح لي من رواية أو ما يشبه العشق التي بين يدي، هي تكتب الحياة، تعبر عن شخصيات حقيقية دون مثالية مزيفة أو مصطنعة، تلقي الضوء على المجتمع كما هو، وعلى القارئ أن يختار إلى أي صف يفضل أن يقف كما تمليه عليه إرادته، وإن كان هذا لا يمنع أن تكون هناك انتقادات لعملها الأدبي
للاطلاع على المراجعة كاملة لرواية #أو_ما_يشبه_العشق للكاتبة #فدوى_حسن يسعدني تشريفكم لي على رابط المراجعة في مدونتي الشخصية
في انتظار تعليقاتكم ومناقشاتكم المثمرة في خانة التعليقات أسفل المقال على المدونة
وإذا أعجبكم المقال يسعدني مشاركتكم له على صفحات مواقع التواصل الاجتماعي المختلفة ليصل إلى أكبر عدد من القراء ويشاركوننا هم أيضاً بآرائهم وتعليقاتهم
كما يسعدني متابعتكم للمدونة من خلال رابط المتابعة بها ليصلكم كل جديد أولاً بأول
#جولة_في_الكتب #روايات
#مقالات #سارة_الليثي

المصدر: أو ما يشبه العشق للكاتبة فدوى حسن

زواج الحب

دي إجابة ليا ع موقع Quora عن سؤال كان عن إن إزاي المحبين يتغلبوا على القيود الإجتماعية ويوصلوا للجواز الشرعي
وحقيقي الموقع ده بيخليني أحب نفسي واحس أني عميقة كدة وبتاع 😀 بعد ما كتبت الإجابة رجعت لورا كدة وقلت ايه العمق اللي أنا فيه ده؟ لا واسترسلت في الإجابة بالفصحى وأنا لو فتحت ملف وورد عشان أكتب مقال في العادي تقعد بطني تكركب وأستتقل الموضوع!:

شرعاً من حق أي شخصين وصلا للسن القانوني أن يتزوجا وفقاً لإرادتهم، ومن يحتج بعدم جواز زواج المرأة بدون ولي، ويجعل هذا باباً لتحكم الأهل والمجتمع في رفض زواج المرأة لمن تحب لأنه ليس ذو مال وفير أو وظيفة مرموقة وما إلى ذلك، مردود عليه بنص الحديث الذي يقتطعه من سياقه؛ فالحديث كامل نصه: عن سليمان بن موسى عن الزهري عن عروة عن عائشة أن النبي قال: “أيما امرأة نكحت بغير إذن وليها فنكاحها باطل فنكاحها باطل فنكاحها باطل فإن دخل بها فلها المهر بما استحل من فرجها فإن اشتجروا ” اشتجرا” فالسلطان ولي من لا ولي له” رواه الخمسة إلا النسائي، وحسنه الترمذي
وإذا كان السلطان ولي من تختلف مع أهلها حول زواجها من شخص معين ترتضيه لنفسها؛ فالسلطان يجيز عقد المرأة البالغة السن القانوني “21 عام” زواجها بنفسها، وهذا من حكمة النص الشرعي، ففي زمن النبي لم تكن هناك فتاة تصل لهذا السن دون أن تتزوج، ومن المعروف شرعاً أن المرأة الثيب التي سبق لها الزواج يحق لها تزويج نفسها دون الرجوع لولي، ولكن لأن علم الله يدرك أن في أزمان لاحقة ستصل المرأة إلى ما بعد العشرين والثلاثين وربما أيضاً الأربعين والخمسين دون أن يسبق لها الزواج، أجرى وحيه بهذا النص على لسان نبيه؛ حتى يكون من حق المرأة الناضجة أن تزوج نفسها إذا ما تعنت أهلها في زواجها بسبب القيود الاجتماعية والأمور الدنيوية الزائلة، وفي نفس الوقت لا يكون الباب مفتوحاً لأي طفلة أن تذهب وتزوج نفسها بأي عابر سبيل دون الرجوع لأحد!
وقد قال رسول الله (صلى الله عليه وسلم): “لم ير للمتحابين مثل النكاح” رواه ابن ماجه وصححه الألباني، ومعنى ذلك أن الشرع حبب وحض على زواج المحبين لا التفريق بينهما
إذاً فالأمر في النهاية يتوقف على المحبين نفسهما، أن تكون رغبتهما قوية وإرادتهما لا يكسرها شيء في سبيل إتمام هذا الزواج، أن يكون لديهما من الإرادة ما يكفي ليكتفيا ببعضهما عن العالم ويبنيا عالمهما سوياً دون الحاجة لأحد، أن لا يرضخا هما للقيود الاجتماعية وينزلا عليها ليتجنبا الصدام، ويحيا كما حيا من سبقهما ولينتهي الأمر وكفى

لغات الحب الخمس للكاتب الأمريكي جاري تشابمان

قراءة في كتاب #لغات_الحب_الخمس للكاتب الأمريكي #جاري_تشابمان على مدونتي الشخصية
في انتظار تعليقاتكم ومناقشاتكم المثمرة في خانة التعليقات على المدونة أسفل المقال
وإذا أعجبتكم القراءة يسعدني مشاركتكم لها على صفحات مواقع التواصل الاجتماعي المختلفة لتصل إلى أكبر عدد من القراء ويشاركوننا هم أيضاً بآرائهم وتعليقاتهم
كما يسعدني متابعتكم للمدونة من خلال رابط المتابعة بها ليصلكم كل جديد أولاً بأول
#جولة_في_الكتب #تنمية_بشرية
#مقالات #سارة_الليثي

المصدر: لغات الحب الخمس للكاتب الأمريكي جاري تشابمان

مصر للمصريين

مؤخراً بقى كل فترة تظهر أصوات منادية بإن الهوية المصرية منفصلة عن العروبة وإننا لازم نرجع لمصريتنا الأصلية وننبذ الانتماء العربي اللي ميخصناش ورغي كتير من هذا القبيل

أي حد يعرفني يعرف قد إيه أنا بعتز بمصريتي وبفخر بالتاريخ المصري القديم وبحب أعرف عنه كل حاجة، بس الحقيقة ان الدعاوي دي محض هراء لا معنى له

لإن الواقع والحقيقة بتقول أن تقريباً مفيش واحد على أرض مصر كلها يقدر يجزم بانتمائه المصري الخالص أو يقدر يثبت انتماءه الجيني الفعلي للمصريين القدماء

أغلب المصريين أصلاً حالياً هم بالأساس من جذور عربية مش مصرية خالص؛ لإن من ساعة الفتح العربي لمصر والعرب توافدوا على مصر سواء كعائلات كاملة بالأساس أو أفراد لوحدهم وتزاوجوا من المصريين واختلطت دمائهم على مر التاريخ، وبعد العرب جه الأتراك وبرضه نفس اللي حصل من توافد وتزواج واختلاط أنساب بما لا يسمح بالفصل بين مين مصري ومين عربي ومين تركي

هيطلع حد يقول يبقى كدة المسيحيين هم المصريين الأساسيين لانهم متزاوجوش مع العرب والأتراك المسلمين إلا بنسب ضئيلة جداً

الحقيقة ان حتى ده برضه كلام مش سليم، لإن أصلاً حتى قبل دخول العرب مصر فكان في قبلهم اليونان وقبلهم الرومان والبطالمة وقبلهم الفرس، والحقيقة ان كل الأجناس دي بعد ما احتلت مصر شعوبها توافدت وحصل نفس التزاوج والتلاحم واختلاط الدماء والأنساب، ونفس الشيء استمر بعد كدة، العرب برضه كان فيهم مسيحيين والله وكانوا بيتجوزوا من المسيحيين المصريين عادي وبيستقروا في مصر وبتستمر عائلاتهم في التكاثر والتناسل، وده واضح حتى في أسماء المسيحيين الحاليين اللي كتير منهم بيحمل أسامي يونانية الأصل إلى جانب الأسماء المصرية والعربية

ولما مصر استقلت وبقت دولة ذات سيادة منفصلة أخيراً فكل الناس اللي كانوا عايشين فيها وحابينها خدوا الجنسية عادي، ومحدش كان ليه نسب ممتد للمصريين القدماء، ولا حد فينا دلوقتي يقدر يدعي ان جده الأكبر كان أمنحتب مثلاً

الحقيقة المرة ان من الجائز أصلاً يكون نسب المصريين القدماء أندثر فعلياً من ع وش الأرض، ولو في حد لسة بيحمل جينات راجعة ليهم فده هيكون بنسبة 1% أو أقل كمان من كمية الجينات اللي جواه من أعراق آخرى

لكن الثابت أن نسبة لا يستهان بها من الشعب المصري الحالي ليها نسب عربي مثبت، ده غير ان الثقافة المشكلة لأغلب وعي الشعب هي الثقافة واللغة العربية؛ فدعاوي نبذ الهوية العربية على الجملة والعودة للهوية المصرية بكل تفاصيلها (المندثرة أساساً) دي دعاوي غير منطقية الحقيقة؛ لإن كل الصلات والروابط الحقيقية انقطعت ومتبقاش منها غير التاريخ

أنا أشجع جداً دراسة التاريخ المصري القديم والافتخار به للطلاب على مستوى المراحل الدراسية المختلفة، ودراسة اللغة الهيروغليفية، والاحتفال بمهرجانات أو احتفالات مصرية قديمة وإعادة احيائها من قبيل الافتخار بالماضي والتوعية بيه وتمثل إنجازاته والتحفيز منها والتنشيط السياحي، لكن أكيد مش هنرجع نعبد إيزيس وأوزوريس وحورس وست ونفتيس وحتحور عشان نحيي الهوية المصرية القديمة يعني 😀

والله أنا عن نفسي كنت أتمنى ان الحضارة المصرية القديمة وثقافتها وديانتها كانت تفضل مستمرة لليوم زي ما دول كتير حضارتها القديمة لازالت مستمرة في الهند واليابان على سبيل المثال، بس للأسف طبيعة المصريين على مر التاريخ كانت الاندماج مع الطبقة الحاكمة والاستسلام للأمر الواقع، فمع كل احتلال كانت الهوية المصرية بتتغير، ولما العرب دخلوا مصر أصلاً مكنش في مصريين قدماء من اللي بنوا الأهرامات وشيدوا المعابد وأسسوا الحضارة والديانة، كانوا مجرد تابعين للدولة الرومانية ومنصهرين فيها

#مصرية_عربية #تحيا_جمهورية_مصر_العربية

#سارة_الليثي

ما وراء النهر ما بعد الحداثة في أدب طه حسين

مقالي #ما_وراء_النهر_ما_بعد_الحداثة_في_أدب_طه_حسين على مدونتي الشخصية
في انتظار تعليقاتكم ومناقشاتكم المثمرة في خانة التعليقات على المدونة أسفل المقال
وإذا أعجبكم المقال يسعدني مشاركتكم له على صفحات مواقع التواصل الاجتماعي المختلفة ليصل إلى أكبر عدد من القراء ويشاركوننا هم أيضاً بآرائهم
كما يسعدني متابعتكم للمدونة من خلال رابط المتابعة بها ليصلكم كل جديد أولاً بأول
#جولة_في_الكتب #روايات
#ما_وراء_النهر لـ #عميد_الأدب_العربي #طه_حسين
#مقالات #سارة_الليثي

المصدر: ما وراء النهر ما بعد الحداثة في أدب طه حسين

إسكندرية

أخيــــــــراً بعد 6 سنين بحر ❤ وبعد 7 سنين إسكندرية 😍 ربنا يفك أسرك يا Mohamed K. El Lethy كنت بنزل معاك البحر وأنا مطمنة كدة لو غرقت هلاقي حد يطلعني 😔 وكنت بلاقي حد ألعب معاه في البحر بدل ما أنزل لوحدي زي قرد قطع كدة 💔 قعدت ألم في القواقع زي ما كنا بنعمل واحنا صغيرين، واللي لحد دلوقتي معرفش المفروض بعد ما نلمها بنعمل بيها ايه يعني 😀 أول ما شوفتها بقول لماما Randa Badr القواقع اهي لسة موجودة، قالت لي ليه كنت فاكراها هتختفي حزناً على عدم وجودك مثلاً ولا حاجة؟! 😏 مشجعة أوي أمي دي -_- وملقتش الورد اللي كنا بنمصه ويطلع عسل وكان في طريقنا للبحر :[ جدير بالذكر ان في اليوم اللي أمي عرضت عليا فيه اننا نسافر إسكندرية يومين، كنت قبلها ماشية في الشارع وإذ فجأة طرأ ع ذهني فكرة إن ماذا لو سافرت إسكندرية بقى أخيراً وروحت البحر، واتصورت ونزلت بوست اني أخيراً روحت اسكندرية 😀 وأول ما روحت لاقيت ماما بتقولي ايه رأيك نروح مع خالتك يومين إسكندرية؟ 🥹 مش عارفة ليه ده مبيحصلش مع كل حاجة أنا بتمناها ❤ يلا ربنا يهدي 😇

#صفحات_من_حياتي #سارة_الليثي

الجنة العذراء للكاتب محمد عبد الحليم عبد الله

قراءة في رواية #الجنة_العذراء للكاتب #محمد_عبد_الحليم_عبد_الله على مدونتي الشخصية
في انتظار تعليقاتكم ومناقشاتكم المثمرة في خانة التعليقات على المدونة
وإذا أعجبتكم القراءة فيسعدني مشاركتكم لها على صفحات مواقع التواصل الاجتماعي المختلفة لتصل إلى أكبر عدد من القراء ويشاركوننا هم أيضاً بآرائهم
كما يسعدني متابعتكم للمدونة من خلال رابط المتابعة بها ليصلكم كل جديد
#جولة_في_الكتب #روايات
#مقالات #سارة_الليثي

المصدر: الجنة العذراء للكاتب محمد عبد الحليم عبد الله

لحظات

ليست كل اللحظات قابلة للتخزين في لقطة كاميرا
هناك بعض اللحظات لفرط عظمتها لا تسعها عدسة كاميرا
وهناك بعض اللحظات لشد استمتاعنا بها ننسى خلالها أن هناك اختراع على وجه الأرض اسمه كاميرا
ننغمس فيها بكل حواسنا وننسى ما عداها
لا نحتاج لكاميرا وصور رقمية تخلدها إذ ليس في الإمكان أن ننساها
هي لحظات تُحفَر في أذهاننا وتُنقَش على قلوبنا ولا نحتاج أن نراها في صور لنتذكرها
فكيف نذكرها إذ لسنا ننساها؟!
هكذا هي لحظاتي معك ❤

دعاء

اللهم اجعل لنا في هذا اليوم دعوة لا ترد…

واوهبنا فيه رزقاً لا يعد…

وافتح لنا في الجنة باباً لا يسد…

واحشرنا في زمرة نبيك محمد صلى الله عليه وسلم…

اللهم حبب خير خلقك فينا….

ومن حوض نبيك اسقينا…

وفي جنتك آوينا…

وبرحمتك احتوينا…

وأمنيتنا اعطينا…

وبفضلك أغنينا…

ولطاعتك اهدينا…

ومن عذاب النار احمينا…

ومن شر كل حاسد أكفينا…

اللهم اجعل لنا في كل درب نخوضه خيراً وفيراً وهوناً وتيسيراً

اللهم إنا نسألك راحة المتقين وسعادة المؤمنين ودعاء الصالحين وأجر الصابرين

وأن تغفر لنا ولوالدينا ولجميع المسلمين

T.B: Me