مؤخراً بقى كل فترة تظهر أصوات منادية بإن الهوية المصرية منفصلة عن العروبة وإننا لازم نرجع لمصريتنا الأصلية وننبذ الانتماء العربي اللي ميخصناش ورغي كتير من هذا القبيل
أي حد يعرفني يعرف قد إيه أنا بعتز بمصريتي وبفخر بالتاريخ المصري القديم وبحب أعرف عنه كل حاجة، بس الحقيقة ان الدعاوي دي محض هراء لا معنى له
لإن الواقع والحقيقة بتقول أن تقريباً مفيش واحد على أرض مصر كلها يقدر يجزم بانتمائه المصري الخالص أو يقدر يثبت انتماءه الجيني الفعلي للمصريين القدماء
أغلب المصريين أصلاً حالياً هم بالأساس من جذور عربية مش مصرية خالص؛ لإن من ساعة الفتح العربي لمصر والعرب توافدوا على مصر سواء كعائلات كاملة بالأساس أو أفراد لوحدهم وتزاوجوا من المصريين واختلطت دمائهم على مر التاريخ، وبعد العرب جه الأتراك وبرضه نفس اللي حصل من توافد وتزواج واختلاط أنساب بما لا يسمح بالفصل بين مين مصري ومين عربي ومين تركي
هيطلع حد يقول يبقى كدة المسيحيين هم المصريين الأساسيين لانهم متزاوجوش مع العرب والأتراك المسلمين إلا بنسب ضئيلة جداً
الحقيقة ان حتى ده برضه كلام مش سليم، لإن أصلاً حتى قبل دخول العرب مصر فكان في قبلهم اليونان وقبلهم الرومان والبطالمة وقبلهم الفرس، والحقيقة ان كل الأجناس دي بعد ما احتلت مصر شعوبها توافدت وحصل نفس التزاوج والتلاحم واختلاط الدماء والأنساب، ونفس الشيء استمر بعد كدة، العرب برضه كان فيهم مسيحيين والله وكانوا بيتجوزوا من المسيحيين المصريين عادي وبيستقروا في مصر وبتستمر عائلاتهم في التكاثر والتناسل، وده واضح حتى في أسماء المسيحيين الحاليين اللي كتير منهم بيحمل أسامي يونانية الأصل إلى جانب الأسماء المصرية والعربية
ولما مصر استقلت وبقت دولة ذات سيادة منفصلة أخيراً فكل الناس اللي كانوا عايشين فيها وحابينها خدوا الجنسية عادي، ومحدش كان ليه نسب ممتد للمصريين القدماء، ولا حد فينا دلوقتي يقدر يدعي ان جده الأكبر كان أمنحتب مثلاً
الحقيقة المرة ان من الجائز أصلاً يكون نسب المصريين القدماء أندثر فعلياً من ع وش الأرض، ولو في حد لسة بيحمل جينات راجعة ليهم فده هيكون بنسبة 1% أو أقل كمان من كمية الجينات اللي جواه من أعراق آخرى
لكن الثابت أن نسبة لا يستهان بها من الشعب المصري الحالي ليها نسب عربي مثبت، ده غير ان الثقافة المشكلة لأغلب وعي الشعب هي الثقافة واللغة العربية؛ فدعاوي نبذ الهوية العربية على الجملة والعودة للهوية المصرية بكل تفاصيلها (المندثرة أساساً) دي دعاوي غير منطقية الحقيقة؛ لإن كل الصلات والروابط الحقيقية انقطعت ومتبقاش منها غير التاريخ
أنا أشجع جداً دراسة التاريخ المصري القديم والافتخار به للطلاب على مستوى المراحل الدراسية المختلفة، ودراسة اللغة الهيروغليفية، والاحتفال بمهرجانات أو احتفالات مصرية قديمة وإعادة احيائها من قبيل الافتخار بالماضي والتوعية بيه وتمثل إنجازاته والتحفيز منها والتنشيط السياحي، لكن أكيد مش هنرجع نعبد إيزيس وأوزوريس وحورس وست ونفتيس وحتحور عشان نحيي الهوية المصرية القديمة يعني 😀
والله أنا عن نفسي كنت أتمنى ان الحضارة المصرية القديمة وثقافتها وديانتها كانت تفضل مستمرة لليوم زي ما دول كتير حضارتها القديمة لازالت مستمرة في الهند واليابان على سبيل المثال، بس للأسف طبيعة المصريين على مر التاريخ كانت الاندماج مع الطبقة الحاكمة والاستسلام للأمر الواقع، فمع كل احتلال كانت الهوية المصرية بتتغير، ولما العرب دخلوا مصر أصلاً مكنش في مصريين قدماء من اللي بنوا الأهرامات وشيدوا المعابد وأسسوا الحضارة والديانة، كانوا مجرد تابعين للدولة الرومانية ومنصهرين فيها
#مصرية_عربية #تحيا_جمهورية_مصر_العربية
#سارة_الليثي
سارة الليثي 