بمناسبة بدء #العام_الدراسي_الجديد واللي من المفترض بتصحبه #رحلات_مدرسية
ده نموذج من الرحلات المدرسية اللي كنا بنطلعها في المدرسة في اليابان في إبتدائي
رحلة لمؤسسة صحفية بنتتبع فيها مراحل إنتاج الصحيفة اليومية بدءاً من كتابة الأخبار وإزاي بيتم طبعها وتلوين الصفحات لحد خروجها للنور وتوزيعها على بائعي الجرائد
قد يظن البعض إن دي رحلات مملة ومش مناسبة للأطفال، لكن الحقيقة اننا كنا بنستمتع فعلاً بالرحلات دي وبنتعلم فيها حاجات جديدة وبنجرب بإيدينا نعمل نفس الشغل اللي بيوريهولنا مش مجرد كلام بيتقال لنا وخلاص
كل مؤسسة مهنية في اليابان كانت بتبقى مخصصة جزء منها لاستقبال الرحلات المدرسية؛ فمخصصة مكان للأطفال يتعلموا فيه شغل المؤسسة ويعملوا نماذج منه بايديهم أياً كان مجال عمل المؤسسة
من الرحلات اللي رحتها برضه أيامها كانت رحلات لمصانع أدوات تكنولوجية ومصانع ألعاب أطفال، كل الحجات دي كنا بنتعلم إزاي بيتم صناعتها وبنعملها بايدينا ونلعب بيها عادي، وده كان بيبقى قمة المتعة، وبيخلي الأطفال يتعرفوا على ميولهم ورغباتهم ويكون عندهم قدرة أوسع على تحديد المهنة اللي بينجذبوا ليها وتتوافق مع ميولهم عشان تبقى هي مجال دراستهم وعملهم الأساسي في الدراسة الجامعية وبعد التخرج، مش مجرد اختيار كليات قمة ليها مظهر بريستيجي أفضل وخلاص حتى لو كانت بعيدة كل البعد عن قدرات الطالب وميوله!
حتى الرحلات اللي كانت في أماكن ترفيهية زي الحدائق والملاهي كنا بنتعلم فيها برضه مش مجرد لعب في التراب وخلاص، بنتعلم أنواع النباتات اللي في الحديقة وإزاي نحافظ عليها وتعيش مدة أطول وايه هي النباتات النادرة الموجودة في المكان والفرق بينها وبين النباتات العادية؟ كنا بنروح أماكن تاريخية وأثرية ونتعلم عن تاريخها والفنون الأثرية اللي فيها، كنا بنتعلم رياضات جديدة لما روحنا نتزلج على الجليد في منطقة جليدية
اللعب والترفيه من المفترض أنه يكون وسيلة تعليمية للطفل، لأن كل خبرة بنمر بيها في حياتنا بشكل عام من المفترض اننا بنتعلم منها حاجة مش مجرد تضييع وقت وخلاص من غير أي إفادة، ياريت المدارس هنا في مصر تحاول تاخد بالها من الموضوع ده ومتبقاش أقصى طموح الرحلات اللي بتعملها أنها توديهم يلعبوا في الملاهي والمراجيح عشان يبقى اسمها عملت رحلة ولا يروحوا يحضروا حفلة ترفيهية وخلاص وكدة يبقى عداها العيب وأزح يعني!
رحلات مدرسية
سارة الليثي 