بنت وحيدة
كل حاجة وعكسها
أنا كل حاجة وعكسها
أنا ألف حاجة في بعضها
أنا عاقلة وهادية في وقتها
ومجنونة وشعنونة بعدها
أنا خجولة وعيني مغمضة
وعيني بجحة لو في الحق قلتها
في لحظة بكون طموحة
متفائلة وبحضن الأمل
جوايا قوة تشق الحجر
وقادرة أغير القدر
وفي لحظة تانية
بكون يائسة ومحبطة
قوتي بكلمة تهدها
وإرادتي أضعف من إنها
تهزم ورقة بعجزها
أنا بحب الحياة وبكرها بعدها
وأرجع أحب الحياة تاني بمرها
والمر مهما زاد في قلبها
هتفضل الحياة هي اللي بحبها
أخاف منها وأحبها
وأكرها وأجري في حضنها
فمتلمش عليا لو كل لحظة بحالة عشتها
أصل أنا جوايا كل حاجة وعكسها
وبعيش كل لحظة بألف حالة في بعضها
وبكرهك وأحبك وأخاف منك
ألف مرة في وقتها
أول حفل توقيع لي: حفل توقيع ديوان 55
دورت عليك
دورت عليك بين القلوب
ملقتش قلب يشبه قلبك
دورت عليك بين الوشوش
ملقتش في طبية ملامحك
دورت عليك بين الضلوع
ملقتش غير همسك
دورت عليك بين العيون
ملقتش غير صورتك
فبرغم كل شيء
وبرغم كل قسوة
وبرغم كل بعد
بيفضل حضنك في الوجود
هو أدفى حضن
ولسة قلبك في الحياة
هو مرسى الحب
ويفضل كتفك هو السند
ومالي غير في حضنك بيت
وبين عيونك ضل وحيط
ومهما فاتت عليا سنين
ومهما مر عليا زمان
فاحتياجي لحبك
وشوقي لحضنك
أكبر من أي زمان
وفوق أي سنين
فيا اللي هاجر بقاله زمان
ياريت دلوقتي ترجع
الموقع أدناه
أقر أنا الموقع أدناه
أنه من يوم ما خد قلبي معاه
من يومها وعقلي بيتمناه
وعيوني مصرة تلقاه
وجفوني بتسهر تستناه
وخيالي بيحلم بلقاه
ومن يومها والنوم مش عارفة ألقاه
وراحة البال أخدها معاه
ولو كان في العمر باقي
وفي الحياة لسة تلاقي
فالنبض اللي في قلبي باقي
والنور اللي في عيني ساهي
متشالين لجل حبه هو
وعمري مش راح يكون لغيره هو
دورت عليك
دورت عليك بين القلوب
ملقتش قلب يشبه قلبك
دورت عليك بين الوشوش
ملقتش في طبية ملامحك
دورت عليك بين الضلوع
ملقتش غير همسك
دورت عليك بين العيون
ملقتش غير صورتك
فبرغم كل شيء
وبرغم كل قسوة
وبرغم كل بعد
بيفضل حضنك في الوجود
هو أدفى حضن
ولسة قلبك في الحياة
هو مرسى الحب
فيا اللي هاجر من زمان
ياريت دلوقتي ترجع
ملاح
ملاح أنا
والبحر في عيونك
ومجداف القلب في ضلوعك
ومرسى الشوق على جفونك
وحب كبير أنا شايله
لنور الصبح على جبينك
وحلم جوايا أنا راسمه
لبكرة يجمعني بيكي
وأمل جوايا أنا شايفه
لولادنا بيخطوا على ايديكي
ودعوة من قلبي طالعة
لربي يحقق أمانيكي
وأشوفك جنبي في الكوشة
والفرحة مالية عنيكي
يا عالية في السما لفوق
يا نجمة كل أحلامي
خليتي للحياة لون
حلى كل أيامي
مطلوب عروسة
مطلوب عروسة
تكون عامية وطرشة
وكمان خرسة ومشلولة
وفي شغل البيت لهلوبة
مطلوب عروسة
تعليمها عالي
وبترطن 7 لغات
انجليزي وفرنساوي وألماني..
بس من بيتها مبتخرجش
وشغل متشتغلش
مطلوب عروسة
يكون طموحها عالي
في الطبيخ والكنس والغسيل
والمسح والتنضيف
مطلوب عروسة
تكون مثقفة وبتفهم في كل حاجة
متقولش غير حاضر ونعم وطيب
مطلوب عروسة
تكون لعبة وزينة في الفترينة
مطلوب عروسة
للزينة
احكيلي
احكيلي عنا
احكيلي عني واحكيلي عنك
احكيلي عن أحلامنا الحلوة
احكيلي عن أيامنا الجاية
احكيلي عن بنت وولد
في الزحمة اتلاقوا
من نظرة اتخطفوا
من همسة عشقوا
وفي ليلة واحدة
بقوا من العاشقين
احكيلي عن بنت وولد
سهروا يعدوا النجوم
خاصموا النوم
حاربوا الظروف
وصلوا للمستحيل
حققوا الحلم
عاشوا مع بعض
وعاشوا لبعض
نصروا الحب
حسوا ببعض
حاربوا البعد
ففرحوا بالقرب
احكيلي وارسملي طريقي
طريق زي طريقهم
مليان حب وورد
مليان شوق وقرب
متعطر بالفل
ارسملي معاك طريق
مالوش نهاية
سارة الليثي 