آدم وحواء

فَوَسْوَسَ إِلَيْهِ الشَّيْطَانُ قَالَ يَا آدَمُ هَلْ أَدُلُّكَ عَلَىٰ شَجَرَةِ الْخُلْدِ وَمُلْكٍ لَّا يَبْلَىٰ (120) فَأَكَلَا مِنْهَا فَبَدَتْ لَهُمَا سَوْآتُهُمَا وَطَفِقَا يَخْصِفَانِ عَلَيْهِمَا مِن وَرَقِ الْجَنَّةِ ۚ وَعَصَىٰ آدَمُ رَبَّهُ فَغَوَىٰ (121)
#سورة_طه

الله من فوق سبع سماوات أخبرنا صراحة في قرآنه الكريم أن الشيطان وسوس لآدم مغرياً له بشهوة الخلود وحيازة الملك الأبدي، وأن آدم هو من عصى الرب وتبعته حواء في المعصية التي قادها إليها
ولكن الأسطورة تقول أن الشيطان تجسد لحواء على هيئة حية زينت لها الأكل من الشجرة المحرمة، وهي من أغوت آدم ليتبعها في المعصية
وعلى الرغم من مخالفة الأسطورة الصريحة لنص القرآن الواضح، إلا أن الكثير من ذكور المسلمين على مر العصور اختاروا تصديق الأسطورة وتكذيب القرآن، والتشدق ليل نهار بها ملقين على النساء جريرتهم، ليحملوا جنس حواء جميعاً ذنب خروجهم من الجنة
#خواطر_قرآنية_رمضانية
كل عام وأنتم بخير
#رمضان_كريم #رمضان_مبارك
#سارة_الليثي

الإعلان

خواطر رمضانية

وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا ۚ إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا (23) وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا (24)

كتير من الأهالي بياخدوا الآية دي ذريعة لاستعباد أولادهم حرفياً من أول ما يوعوا ع الدنيا لحد ما هم وعيهم يغيب عنها، وبتبقى وسيلة ترهيب في وش أي اعتراض من الأبناء على أسلوب حياة هم عايزن يعيشوه أو رغبات وطموحات عايزين يحققوها مختلفة عن اللي أهاليهم عايزينه، بدءاً من تسخير الأطفال في طفولتهم ومراهقتهم لخدمة أهاليهم حرفياً لو كوباية مية حتى الطفل هو اللي لازم يقوم يجيبها وإلا يبقى عاق لو حتى بس اعترض في حين إن الأم أو الأب موفورين الصحة وفعلياً مش محتاجين حد يعمل لهم حاجة بس هي تحكمات وخلاص عشان يثبتوا ان ليهم السلطة العليا، ومع تقدم العمر تبدي التدخلات أكتر وأكتر في كل تفاصيل الحياة من دراسة لشغل لجواز، ولازم الابن أو الابنة يسمعوا الكلام وينفذوه بدون اعتراض وإلا يبقوا عاقين، دي قول أف بس حرام ما بالك بأي اعتراض آخر، على الرغم من إن بعض الأبناء مبيملكوش قصاد التدخل السافر ده في أدق تفاصي حياتهم إلا إنهم يتأففوا ويتنرفزوا ويجععوا على الفاضي بس للتنفيس، وفي الآخر بيعملوا اللي أهلهم عايزينه غصب عنهم عشان مبيجيلهمش قلب يعارضوهم فعلاً، سواء عن حب وعدم رغبة في معارضتهم أو خوف من النبذ أو ضعف شخصية، في جميع الأحوال من غير العادل على الاطلاق إني اجبر اللي قدامي يدمر حياته بايده عشان أنا شايفة ان ده الأفضل من وجهة نظري واتهمه كمان بالعقوق لمجرد انه نفس عن نفسه بشوية جعجعة فارغة!
بس الحقيقة إن الآية هنا واضحة في نصها انها بتتكلم عن الأب والأم لما يبلغوا الكبر ويبقوا مش قادرين ع خدمة نفسهم ومراعاة شئونهم، في الحالة دي واجب على الابناء مراعاتهم وخدمتهم بدون تأفف؛ عشان ميحسسوهمش باحتياجهم وضعفهم وذلتهم وانهم بقوا عالة وعبء عليهم، وان ده رد لمعاملتهم ليه في الصغر زي ما كانوا بيتحملوا خدمته ومراعاة أموره بدون تأفف أو تذمر “رَّبِّ ارْحَمْهُمَا كَمَا رَبَّيَانِي صَغِيرًا”، مش لسحقهم ليه ولرغباته وحياته ع مدى طول حياته!
#خواطر_قرآنية_رمضانية
كل عام وأنتم بخير
#رمضان_كريم #رمضان_مبارك
#سارة_الليثي

زواج الحب

دي إجابة ليا ع موقع Quora عن سؤال كان عن إن إزاي المحبين يتغلبوا على القيود الإجتماعية ويوصلوا للجواز الشرعي
وحقيقي الموقع ده بيخليني أحب نفسي واحس أني عميقة كدة وبتاع 😀 بعد ما كتبت الإجابة رجعت لورا كدة وقلت ايه العمق اللي أنا فيه ده؟ لا واسترسلت في الإجابة بالفصحى وأنا لو فتحت ملف وورد عشان أكتب مقال في العادي تقعد بطني تكركب وأستتقل الموضوع!:

شرعاً من حق أي شخصين وصلا للسن القانوني أن يتزوجا وفقاً لإرادتهم، ومن يحتج بعدم جواز زواج المرأة بدون ولي، ويجعل هذا باباً لتحكم الأهل والمجتمع في رفض زواج المرأة لمن تحب لأنه ليس ذو مال وفير أو وظيفة مرموقة وما إلى ذلك، مردود عليه بنص الحديث الذي يقتطعه من سياقه؛ فالحديث كامل نصه: عن سليمان بن موسى عن الزهري عن عروة عن عائشة أن النبي قال: “أيما امرأة نكحت بغير إذن وليها فنكاحها باطل فنكاحها باطل فنكاحها باطل فإن دخل بها فلها المهر بما استحل من فرجها فإن اشتجروا ” اشتجرا” فالسلطان ولي من لا ولي له” رواه الخمسة إلا النسائي، وحسنه الترمذي
وإذا كان السلطان ولي من تختلف مع أهلها حول زواجها من شخص معين ترتضيه لنفسها؛ فالسلطان يجيز عقد المرأة البالغة السن القانوني “21 عام” زواجها بنفسها، وهذا من حكمة النص الشرعي، ففي زمن النبي لم تكن هناك فتاة تصل لهذا السن دون أن تتزوج، ومن المعروف شرعاً أن المرأة الثيب التي سبق لها الزواج يحق لها تزويج نفسها دون الرجوع لولي، ولكن لأن علم الله يدرك أن في أزمان لاحقة ستصل المرأة إلى ما بعد العشرين والثلاثين وربما أيضاً الأربعين والخمسين دون أن يسبق لها الزواج، أجرى وحيه بهذا النص على لسان نبيه؛ حتى يكون من حق المرأة الناضجة أن تزوج نفسها إذا ما تعنت أهلها في زواجها بسبب القيود الاجتماعية والأمور الدنيوية الزائلة، وفي نفس الوقت لا يكون الباب مفتوحاً لأي طفلة أن تذهب وتزوج نفسها بأي عابر سبيل دون الرجوع لأحد!
وقد قال رسول الله (صلى الله عليه وسلم): “لم ير للمتحابين مثل النكاح” رواه ابن ماجه وصححه الألباني، ومعنى ذلك أن الشرع حبب وحض على زواج المحبين لا التفريق بينهما
إذاً فالأمر في النهاية يتوقف على المحبين نفسهما، أن تكون رغبتهما قوية وإرادتهما لا يكسرها شيء في سبيل إتمام هذا الزواج، أن يكون لديهما من الإرادة ما يكفي ليكتفيا ببعضهما عن العالم ويبنيا عالمهما سوياً دون الحاجة لأحد، أن لا يرضخا هما للقيود الاجتماعية وينزلا عليها ليتجنبا الصدام، ويحيا كما حيا من سبقهما ولينتهي الأمر وكفى

حب أبدي

أنا مؤمنة بوجود الحب الأبدي وان كل واحد فينا ربنا خلق له الانسان اللي يكمله ويتطابق معاه، مش لانهم متشابهين بالعكس لانهم مختلفين بس الاختلاف اللي بيكمل مش اللي ينفر

لكن ده مش معناه ان كل علاقة حب أو ارتباط الواحد بيتعرض لها في حياته يصر ان هو ده حبه الأبدي اللي مينفعش يتخلى عنه أو يتصدم انه مكملش بالطريقة اللي كان متصورها فيفقد الثقة في وجود الحب من الأساس أو في إمكانية إنه يلاقيه

أصلاً النوع ده من الحب مبيتلاقاش من أول مرة، وربنا بيكتب لنا تجارب قبله نمر بيها عشان لما نلاقيه نعرفه ونقدر قيمته ونعرف قد إيه هو مختلف عن غيره

لكن أي علاقة تانية بتنتهي بشكل نهائي مالوش رجوع سواء بسبب ظروف الحياة والمجتمع أو حتى الموت تبقى مش دي علاقة الحب الأبدي اللي متقدرة لنا من قبل ما نتوجد ع الأرض

أصل الحب الحقيقي مبينتهيش تحت أي ظروف، والحب الأبدي اللي ربنا كاتبه لكل واحد مبينتهيش من غير اتحاد، والاتنين اللي بيتشاركوا علاقة حب أبدي مبيقدروش يعيشوا فعلياً من غير بعض، يا بيموتوا مع بعض في نفس الوقت، يا بيحصلوا بعض بفرق بسيط أوي مبيكترش عادة عن سنة أو اتنين بالكتير أوي

وأنا مؤمنة برضه أني هلاقي الحب ده في يوم من الأيام، هعيش معاه اللي باقي من عمري ونموت مع بعض وندفن في قبر واحد ❤

* الصورة دي طبعاها في صور أمنياتي اللي نفسي أحققها في حياتي ودي آخر أمنية فيهم -بطبيعة الحال يعني- ومعلقاهم ع الحيطة قدامي عشان اصطبح بيهم كل يوم كدة وأوثق ان آخر يوم في حياتي هيكون بالشكل ده ^_^ 

#سارة_الليثي

المرأة

والله هي المرأة لا حذاء ولا تاج

الاتنين مجرد أشياء لا إرادة لها ولا اختيار ولا هيفرق معاهم يكونوا في القدم ولا ع الرأس وممكن في أي لحظة يترموا ويتبدلوا بغيرهم

لكن المرأة انسانة مساوية للرجل تماماً في الحياة ومكملة له “النساء شقائق الرجال”

وهي ملكة الملك وشريكته في عرشه مش تاجه اللي ممكن في أي وقت ميعجبوش ويحب يغير شكله فيرميه في النار عشان يشكله بشكل جديد ع مزاجه من غير ما التاج يحس أو يعترض!

وفي نفس الوقت كيانها واحترامها غير مرتبط بيه وانما نتيجة لشخصها هي فكون الرجل مستواه متدني في مستوى الأقدام ده مش هيحط منها ويخليها هي حذاء

#سارة_الليثي

حق الكد والسعاية

دايماً كنت بتناقش مع أمي ان مش من المنطقي ان الواحدة تتجوز واحد ع الفيض الكريم وتشرب معاه المر وهي حاطة كتفها بكتفه وبتشتغل بإيديها وسنانها عشان ترفع منه ومن حياتهم مع بعض، سواء بانها بتنزل تشتغل معاه في الشغل الخاص بتاعه أياً كان بدون مقابل، أو انها بتشتغل برة وتصرف ع البيت والولاد زيها زيه ويمكن أكتر، وفي الآخر أول ما القرش يجري في ايده يقوم راميها أو جايب لها ضرة، وهي لازم ترضى وإن مكنش عاجبها مع السلامة يا تطلق أو تخلع، وحتى لو اطلقت مش خلعت وأخدت حقوقها في المؤخر والنفقة وطلعت بشبكتها، ده إذا مكنش بيعها لها قبل كدة في زنقته يعني، فكل ده هيبقى ولا حاجة بالنسبة للي هي عملته معاه، أصل أكيد اللي اتجوزت واحد ع الفيض الكريم مكنش جايب لها شبكة بألوفات ولا كاتب لها مؤخر ملايين يعني، ففي الآخر هو بيرميها بعد ما يمص دمها ويدي خيرها وتعبها وشقاها لواحدة تانية ع الجاهز تيجي تاخد الدلع كله ومتشيلش الياسمينة من ع الأرض ويبقى هو جني المصباح اللي بيحقق لها كل أمانيها، واللي بنت الخير ده كله بايديها وعرقها متدوقش منه حاجة وتطلع كمان بكسرة القلب وقلة الكرامة لا في حب يعوضها المرمطة اللي اتمرمطتها طول عمرها ولا في قرش تتسند عليه وتبدأ بيه من جديد!

كان رد أمي دايماً ان ده شرع ربنا واللي مش عاجبها متعملش حاجة من الأول هي لا ملزمة تشتغل معاه ولا تصرف ع البيت وتبقى تستنى الغني اللي يدلعها من الأول!

بس الطبيعي ان مفيش واحدة بتحط السيناريو ده في دماغها من الأول، ومهما شافت قدامها من حالات حقيقية وقت ما بيجي عليها الدور وتدب ع بوزها بتبقى فاكرة ان اللي معاها ده غير كل الناس وانه هيقدر ويشيلها في حبابي عنيه وكل ما هتديه وتكافح عشانه هو هيحبها ويقدرها أكتر، ومش طبيعي ان البيوت تتبني من البداية ع التخوين، الواحدة بتدخل مع واحد بتحبه بتبقى عايزة تهون عليه وتساعده وتشيل عنه، وبتبقى معتقدة انه هيفضل مخلص ليها طول العمر وشايل جميلها، بس لو طلع خاين وقليل أصل أو طفس وشايف ان كل متع الدنيا من حقه، فهي كمان ليها حقوق، ومش عدل أبداً انه يبقى أخدها لحم ويرميها عضم عشان هو من حقه يستمتع وهي لازم ترضى أو تترمي!

عمري ما كنت بقتنع ان ده شرع ربنا، ربي اللي بعبده اسمه العدل، واللي كان بيحصل ويتقال ده مفيهوش ريحة العدل، وسبحان الله طلع مش شرع ربنا ولا حاجة، شرع ربنا اننا نحكم بين الناس بالعدل وندي كل صاحب حق حقه، وهو د العدل وهي دي الحقوق

#حق_الكد_والسعاية

بيج رامي

بغض النظر عن واقعة #بيج_رامي تحديداً وإذا كان زواجه حقيقي ولا تمثيل

إنما بالنسبة لكل الناس اللي بيدافعوا عنه وعن الفكرة في المطلق وبيقولوا أنها حق شرعي للراجل

اللي عايز يتكلم عن الحق الشرعي من الأول كدة يعرف ان الحق الشرعي للمرأة انه يدفع لها مهرها كاملاً تحطه في جيبها مالوش حق في مليم منه ويجيب لها بيت ويجهزه من مجامعيه بنفس المستوى اللي هي عايشة فيه في بيت أهلها وهي متجيبش قشاية فيه، ومن حقها الشرعي انه يجيب لها خادم يخدمها ويخدمه، ولو ظروفه المادية متسمحش وهي رضيت بظروفه دي؛ فهو المسئول عن خدمة نفسه هي مش مسئولة عن خدمته، وهو المسئول عن كافة نفقاتها وانه يعيشها في نفس المستوى اللي كانت عايشة فيه في بيت أهلها، وهي واجبها الشرعي هو حسن التبعل له وحفظه في نفسها وأن لا تدخل بيته أحداً يكرهه ولا تخرج من بيته إلا بإذنه فلما يبقى يعمل ده يبقى يقول أنا حقي الشرعي أتجوز تاني وأعدد، وبرضه هي حقها الشرعي في الحالة دي انها ترفض وتطلب الطلاق وتاخد كل مستحقاتها المادية، وفي حالة انها فضلت على ذمته برضها؛ فحقها الشرعي العدل التام بينها وبين زوجته الثانية، مش مجرد عدل روتيني في المبيت والانفاق وخلاص، لا العدل بيكون حتى في النظرة والبسمة ولو هي معرفتهاش ربنا عارفها، والحاجة الوحيدة اللي مش هيتحاسب عليها هو ميله القلبي الداخلي، لكن كل تصرف هيصدر منه هيتحاسب عليه لو معدلش فيه حتى لو التانية معرفتهوش أصلاً أما بقى لما تطفح معاه الكوتة وتطلع عينها عشان جوزها يبقى بني آدم ملو هدومه وتستثمر حياتها كلها فيه، وهو أول ما تزهزه معاه ويشم نفسه أول حاجة يفكر فيها انه يروح يتجوز عليها ويدي كل مجهودها وتعبها وشقى عمرها ع طبق من دهب لواحدة تانية لو كان راح لها من الأول كانت تفت في وشه ورميته في الزبالة ولا بصت في خلقته أصلاً، ويقول أصل ده حقي الشرعي؛ فده في شرع أبوه؛ لان ربنا شرط فيها العدل وهو عمره ما هيقدر يعدل لان العدل بيقول ان التانية تطفح من اللي طفحته الأولى قبل ما تتمتع بمجهود الأولى اللي وصلته ليه! وفي الآخر يرجعوا يزعلوا لما البنات بيبقوا عايزين يتجوزوا واحد جاهز من الأول ويقولوا أنهم بقوا ماديين، أمال انتم عايزين ايه؟ يروحوا يتجوزوا ناس محيلتهمش اللضى يكافحوا ويحرقوا عمرهم معاهم وأول ما يبقى معاهم قرشين يرموهوم ويروحوا يتجوزوا اللي عايزة الجاهز ع الجاهز!

علامات تدل على تعلق الزوج بالماضي

مقالي #علامات_تدل_على_تعلق_الزوج_بالماضي على موقع #الامنيات_برس
في انتظار تعليقاتكم ومناقشاتكم المثمرة في خانة التعليقات على الموقع
#مقالات #سارة_الليثي

صفحة سارة الليثي لمشاركة المقالات المفيدة

علامات الاعجاب السبع

مقالي #علامات_الاعجاب_السبع على موقع #الامنيات_برس
في انتظار تعليقاتكم ومناقشاتكم المثمرة في خانة التعليقات على المقال بالموقع
#مقالات #سارة_الليثي

صفحة سارة الليثي لمشاركة المقالات المفيدة

التعبير عن الحب وطرقه المبتكرة

مقالي #التعبير_عن_الحب_وطرقه_المبتكرة على مدونتي الشخصية
في انتظار تعليقاتكم ومناقشاتكم المثمرة في خانة التعليقات على المدونة
كما يسعدني متابعتكم للمدونة من خلال رابط المتابعة بها ليصلكم كل جديد
#عن_الحياة_نتحدث #عن_الحب
#مقالات #سارة_الليثي

المصدر: التعبير عن الحب وطرقه المبتكرة